中国微企网
广州老字号歌舞厅市二宫艺苑歌舞厅引感慨
发布日期： 2021-05-18 15:23:24 来源： 信息时报

白话广州

最近，一则市二宫艺苑歌舞厅拆除嘅消息，引起好多广州老街坊嘅关注。

艺苑歌舞厅始创于上世纪80年代，算得上系广州一间老字号歌舞厅。

上世纪80年代初期，市民嘅夜生活开始兴起跳交谊舞，因应呢种需求，好多地方都开咗舞厅，其中包括市一宫、市二宫、市三宫、青宫等“宫”字单位。

市二宫地处河南，喺嗰个年代，相对于喺正中心区嘅另外三“宫”嚟讲，地头比较偏。但偏有偏嘅优势，就系地方多，所以市二宫将一栋原先两层高嘅大楼改成舞厅，面积超过一千平方，成为全市最大嘅舞厅。

喺建筑方面，“艺苑”仲有一个特色，就系门口嘅灯饰设计，日头睇冇乜特别，但到晚黑一开灯就似一只孔雀喺度开屏。

艺苑歌舞厅虽然个名有个“歌”字，但主要系跳舞，系广州最出名嘅舞厅之一，喺嗰度跳舞嘅人当中不乏“舞”林高手，其中有一男一女(两公婆)仲攞过全国跳舞十项全能季军。

随住时代嘅变化、需求嘅变化，广州呢类舞厅宜家已经执得七七八八，“艺苑”属为数唔多可以捱到今时今日嘅喇，所幸嘅系，呢次拆除只系重新改建，亦即系讲，“艺苑”以后可以舞照跳，“孔雀”晚黑照开屏。(阿六)

标签： 老字号歌舞厅，广州，二宫艺苑歌舞厅，跳舞十项全能季军

觉得很赞？
分享至：
资讯播报
本月热门新闻
24小时热点 24小时热点
精彩推送

 
  • © 中国微企网 沪ICP备2020036824号-15版权所有
  •  
  • 文章投诉邮箱：5 1467611 3@qq.com
  • 联系邮箱：562 66 29@qq.com